Pipp bollur með perum

Vatnsdeigsbollur uppskrift

250 ml vatn
125 g smjör
125 g hveiti
4 egg

Stillið ofn á 180°c. Setjið vatn og smjör í pott og leyfið smjörinu að bráðna. Takið pottinn af hitanum og hrærið hveitinu saman við þar til deigið er orðið einn massi, kælið deigið örlítið. Setjið deigið í hrærivélarskál og bætið eggjunum út í einu í einu og hrærið vel á milli. Setjið deigið þá í sprautupoka og sprautið bollur á smjörpappírsklædda plötu, eða notið tvær teskeiðar til setja deigið á plötuna. Bakið í 18-20 mínútur.  Ef þið viljið hafa bollurnar stærri þá er tíminn aukinn í samræmi við það.

Pipp búðingur fylling

250 ml rjómi
250 ml nýmjólk
1 pk Pipp Royal búðingur
1-2 vel þroskaðar perur eða niðursoðnar

Byrjið á því að útbúa búðinginn og setjið inn í ísskáp meðan þið gerið bollurnar.
Blandið öllu saman í skál og þeytið vel saman í 2-3 mín. Setjið lok eða plastfilmu yfir skálina og kælið.
Afhýðið perurnar og skerið í litla bita.
Takið þá búðinginn úr ísskápnum. Gott er að þeyta aðeins upp í honum aftur í 2-3 mín til að fá áferðina líkari rjóma Setjið í sprautupoka með stút en einnig er hægt að nota skeið.
Sprautið búðingnum á neðri hluta bollunnar og setjið 3-4 bita af peru í miðjunni á hverri bollu og lokið með efri partinum. Endurtakið við allar bollurnar.

Súkkulaði og skraut

50 g Nóa kropp
100 g suðusúkkulaði
30 ml rjómi

Setjið Nóa kroppið í plastpoka og lemjið með buffhamri eða kökukefli, þangað til allar kúlurnar hafa farið í sundur og setjið í skál.
Setjið þá súkkulaði og rjóma saman í skál og bræðið í örbylgjuofni eða yfir vatnsbaði.
Skerið bollurnar í tvennt og dýfið efri hlutanum ofan í súkkulaðið og beint í Nóa kropp kurlið.

Uppskrift fengin í láni frá Pipp & peru bollur – Döðlur & smjör (dodlurogsmjor.is)